Без – кунакта: Сабада. Мактанырлык та...

Май чүлмәге тышыннан билгеле, ди безнең халык. Гүзәл Рафис кызы җитәкчелегендәге тәрбиячеләр дә уңганлыклары белән әллә кайдан аерылып торалар. Эшләгән эшләре, уңышлары бихисап. 

«Педагогларыбыз һәм балалар һәрдаим район, республика, бөтенроссия күләмендә уздырылучы конкурсларда, акцияләрдә, олимпиадаларда актив катнашалар, призлы урыннар яулыйлар. Шулай ук тәҗрибә уртаклашу максатыннан тәрбиячеләребез семинар һәм конференцияләрдә чыгыш ясыйлар. Бакчабыз 2018 елда иң яхшы билингвал балалар бакчасы исеменә лаек булды һәм 500 мең күләмендә акчалата премия алды. 2021 елда Татарстан Республикасында Туган телләр һәм Халыклар бердәмлеге елы кысаларында үткәрелгән «Муниципаль мәктәпкәчә белем бирү оешмалары һәм муниципаль гомуми белем бирү оешмалары Татарстан Республикасында яшәүче халыкларның телләрен, гореф-гадәтләрен, мәдәниятләрен үстерүгә юнәлдерелгән проектларны тормышка ашыруда ярдәм» грантында катнашып җиңү яуладык һәм 500 мең грантка лаек булдык» - дип уңышларын санап узды Гүзәл Рафисовна.