Балаларга көз турында шигырьләр

Көз

Күрәмсез, дусларым, көз   килде  тышта;
Озак тормас, килер  ак  тунлы  кыш  та. 
Китә башлады  бездән инде  кошлар; 
Алар  бездән  ерак җирләрдә кышлар.

                                          Габдулла Тукай

Көз җитте

Киң болыннарда,

Урман-кырларда

Агачлар, гөлләр

Кибеп сулдылар.

Уйсу җирләрдә,

Елга-күлләрдә

Көзге салкыннан

Сулар туңдылар.

Көннәр суынды,

Чишмәләр тынды.

Безне калдырып,

Кошлар да китте.

Кошлар шикелле,

Бергә гөр килеп,

Мәктәптә укыр

Вакытлар җитте.

                  Муса Җәлил

Кошлар киткәндә

– Сыерчыгым, нигә китәсең?

Сагынырмын сине, киткәчтен.

– Көз җитте бит инде, мин туңам,

Килгән идем җәйге костюмнан.

                               Бари Рәхмәт

Көзге яңгыр
  

– Апа, безгә артыбыздан
Шыбыр-шыбыр кем дәшә?
– Кем дә дәшми, көзге яңгыр
Зонтик белән сөйләшә.

                            Мәрзия Фәйзуллина 

Яфрак бәйрәме

Яңгыр түгел, кар да түгел,
Яфраклар ява җиргә.
Көз турында җырлыймын мин —
Кушыл син яңа җырга.
Сары, сары, сап-сары
Агачның яфраклары.
Җил исә, ява яфрак —
Көзнең матур чаклары.
Оча яфрак, уйный яфрак
Һаваларда әйләнеп.
Бүген, бүген, бүген, бүген
Яфракларның бәйрәме!

                            ЛәбибЛерон